ସଂଗ୍ରାମ କେଶରୀ ସେନାପତିଙ୍କ ପ୍ରଥମ ଓଡ଼ିଆ ଉପନ୍ୟାସ 'ସିଗାରେଟ୍' ଉନ୍ମୋଚିତ

ଭଦ୍ରକ (୧୩ ଅପ୍ରେଲ ୨୦୨୬): ଗତକାଲି ଟାଇମ୍‌ପାସ୍ ପ୍ରକାଶନ ସଂସ୍ଥା ଦ୍ୱାରା ଭୁବନେଶ୍ୱର ବୁଦ୍ଧ ମନ୍ଦିର ଠାରେ ଆୟୋଜିତ ବହି ବିଷୁବ କାର୍ଯ୍ୟକ୍ରମରେ ସଂଗ୍ରାମ କେଶରୀ ସେନାପତିଙ୍କ ପ୍ରଥମ ଓଡ଼ିଆ ଉପନ୍ୟାସ 'ସିଗାରେଟ୍' ଉନ୍ମୋଚିତ ହୋଇଯାଇଛି । ମୁଖ୍ୟ ଅତିଥି କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାରପ୍ରାପ୍ତ ଓଡ଼ିଆ କବି ଶ୍ରୀଯୁକ୍ତ ବଂଶୀଧର ଷଡ଼ଙ୍ଗୀ ଓ ପ୍ରକାଶକ ସରୋଜ ବଳଙ୍କ ଉପସ୍ଥିତିରେ ଏହି ବହିଟି ଉନ୍ମୋଚିତ ହୋଇଥିଲା ।

ଟାଇମ୍‌ପାସ୍ ଦ୍ୱାରା ଆୟୋଜିତ ପ୍ରଥମା ପ୍ରତିଯୋଗିତାରେ ସଂଗ୍ରାମଙ୍କର ଏହି ଉପନ୍ୟାସ ସହିତ ଅନ୍ୟ ୧୧ଟି ପୁସ୍ତକ ନିର୍ବାଚିତ ହୋଇ ପୂର୍ବରୁ ପ୍ରଥମା ପୁରସ୍କାର ଲାଭ କରିଥିଲା । କଲେଜ ସମୟର ଏକ ପ୍ରେମ କାହାଣୀକୁ ଉପନ୍ୟାସର ରୂପ ଦେଇଥିବା ସଂଗ୍ରାମ ଶୁଭପଲ୍ଲବ ଓଡ଼ିଆ ପତ୍ରିକା ପ୍ରତିଷ୍ଠାତା ସମ୍ପାଦକ ଭାବରେ କାର୍ଯ୍ୟ କରୁଥିବାବେଳେ ଉଇକିପିଡ଼ିଆର ଜଣେ ସକ୍ରିୟ ସମ୍ପାଦକ ଭାବରେ ୩,୬୦୦ରୁ ଅଧିକ ପ୍ରସଙ୍ଗ ଲେଖିବା ସହ ବିଭିନ୍ନ ଜାତୀୟ ତଥା ଆନ୍ତର୍ଜାତୀୟ କାର୍ଯ୍ୟକ୍ରମରେ ଯୋଗ ଦେଇଛନ୍ତି ।

ସୂଚନା ଥାଉକି, ଶୁଭପଲ୍ଲବ ପ୍ରକାଶନ ଦ୍ୱାରା ପ୍ରକାଶିତ ସଂଗ୍ରାମଙ୍କର ପ୍ରଥମ ଇଂରାଜୀ ଉପନ୍ୟାସ 'ଦି ଇଅର୍ ସି ଡିସାପିଅର୍‌ଡ୍' ଗତ ସପ୍ତାହରେ ଉନ୍ମୋଚିତ ହୋଇଥିଲା, ଯାହାକି ଉଭୟ ବହି ଓ ଇ-ବୁକ୍ ଭାବରେ ଯଥାକ୍ରମେ ଆମାଜନ୍ ଓ କିଣ୍ଡଲ୍‌ରେ ଉପଲବ୍ଧ ଅଛି । ସଂଗ୍ରାମ ତାଙ୍କର ଏହି ନୂଆ ବହି ପାଇଁ ଖୁସି ବ୍ୟକ୍ତ କରିବା ସହ ଟାଇମ୍‌ପାସ୍‌ର ନିର୍ଦ୍ଦେଶକ ସରୋଜ ବଳଙ୍କୁ ଧନ୍ୟବାଦ ଜଣାଇଛନ୍ତି ଏବଂ ନିଜ ବହିଟି ପାଠକୀୟ ଆଦୃତି ଲାଭ କରିବ ବୋଲି ଆଶା ପ୍ରକାଶ କରିଛନ୍ତି । ବହିଟି ଟାଇମ୍‌ପାସ୍ ବୁକ୍ କ୍ୟାଫେ ଓ ଆମାଜନ୍ ଇଣ୍ଡିଆରେ ଉପଲବ୍ଧ ଅଛି ।

ସଂଗ୍ରାମ କେଶରୀ ସେନାପତିଙ୍କ ଇଂରାଜୀ ଉପନ୍ୟାସ 'ଦି ଇଅର୍ ସି ଡିସାପିଅର୍‌ଡ୍' ଉନ୍ମୋଚିତ

ବାଲେଶ୍ୱର (୫ ଅପ୍ରେଲ ୨୦୨୬): ଆଜି ବାଲେଶ୍ୱର ଆଜିମାବାଦ ଠାରେ ଆୟୋଜିତ ଏକ କାର୍ଯ୍ୟକ୍ରମରେ ସଂଗ୍ରାମ କେଶରୀ ସେନାପତିଙ୍କ ଇଂରାଜୀ ଉପନ୍ୟାସ 'ଦି ଇଅର୍ ସି ଡିସାପିଅର୍‌ଡ୍' ଉନ୍ମୋଚିତ ହୋଇଯାଇଛି । ମିଶନ୍ ସକ୍ସେସ୍‌ଠାରେ ଆୟୋଜିତ ଅଭିଳାଷା ଓପନ୍ ମାଇକ୍ କାର୍ଯ୍ୟକ୍ରମରେ ଅତିଥି ଭାବରେ ଯୋଗ ଦେଇଥିଲେ କବୀ ଅଭିଲିପ୍ସା ପାଢ଼ୀ, ଉତ୍କଳିକା ରାଉତ ଓ ଏପି ଶୁଭକାନ୍ତ ସାମଲ । କଲେଜ ସମୟର ପ୍ରେମ କାହାଣୀ ଆଧାରରେ ଏହି ଉପନ୍ୟାସଟି ଶୁଭପଲ୍ଲବ ପବ୍ଲିକେଶନ୍ ଦ୍ୱାରା ପ୍ରକାଶିତ ହୋଇଛି, ଯାହାକି ଆଗାମୀ ଦିନରେ ଓଡ଼ିଆ ଭାଷାରେ ମଧ୍ୟ ପ୍ରକାଶ ପାଇବାକୁ ଯାଉଛି ।

ସୂଚନା ଥାଉକି ସଂଗ୍ରାମଙ୍କର ଏହା ପ୍ରଥମ ଇଂରାଜୀ ଉପନ୍ୟାସ ଏବଂ ତାଙ୍କ ରଚିତ ଓଡ଼ିଆ ଉପନ୍ୟାସ 'ସିଗାରେଟ୍' ଆଗାମୀ ସପ୍ତାହରେ ଟାଇମ୍‌ପାସ୍ ପ୍ରକାଶନ ଦ୍ୱାରା ଉନ୍ମୋଚିତ ହେବାକୁ ଯାଉଛି । ଏହି କାର୍ଯ୍ୟକ୍ରମରେ ବାଲେଶ୍ୱରର ବିଭିନ୍ନ ଯୁବ କବି ଓ ଲେଖକମାନେ ଯୋଗ ଦେଇ, ନିଜ ନିଜର ଗପ ଓ କବିତା ଉପସ୍ଥାପନା କରିବା ସହିତ ସଙ୍ଗୀତ ପରିବେଷଣ ଓ ଷ୍ଟାଣ୍ଡଅପ୍ କମେଡ଼ି ମଧ୍ୟ ପରିବେଷଣ କରାଯାଇଥିଲା । ଅଭିଳାଷା ଦ୍ୱାରା ବାଲେଶ୍ୱରରେ ଆୟୋଜିତ ଏହା ପ୍ରଥମ ଓପନ୍ ମାଇକ୍ ଥିଲା, ତେଣୁ ଯୋଗ ଦେଇଥିବା ଅତିଥି ଓ କବିମାନେ ବେଶ୍ ଉତ୍ସାହୀ ଥିଲେ ।

ବହିଟି ଆମାଜନ୍‌ରେ ଉପଲବ୍ଧ ଅଛି: https://amzn.to/4vdSy74

ଭଦ୍ରକରେ ଆୟୋଜିତ ହେବାକୁ ଯାଉଛି ‘ସାଳନ୍ଦୀ ସାହିତ୍ୟ ସଙ୍ଗମ’ର ୩ୟ ସଂସ୍କରଣ

ଭଦ୍ରକ (୧୯ ଜାନୁଆରୀ ୨୦୨୬): ଭୁବନେଶ୍ୱରରେ ଅବସ୍ଥାପିତ ଓଡ଼ିଶାର ସ୍ୱନାମଧନ୍ୟ ପ୍ରକାଶନ ସଂସ୍ଥା ‘ଟାଇମ୍‍ପାସ’ ପକ୍ଷରୁ ଭଦ୍ରକଠାରେ ବିଗତ ଦୁଇବର୍ଷ ଧରି ଆୟୋଜିତ ହୋଇଆସୁଥିବା ନିଆରା ସାହିତ୍ୟ ଉତ୍ସବ ‘ସାଳନ୍ଦୀ ସାହିତ୍ୟ ସଙ୍ଗମ’ର ତୃତୀୟ ସଂସ୍କରଣ ଆଗାମୀ ଫେବୃଆରୀ ୧୪ ଓ ୧୫ ଦୁଇଦିନ ଧରି ଅନୁଷ୍ଠିତ ହେବାକୁ ଯାଉଛି । ସାଳନ୍ଦୀ ବାଇପାସସ୍ଥିତ ‘ସଙ୍ଗମ କନ୍‍ଭେନ୍‍ସନ୍‍’ରେ ପ୍ରତ୍ୟହ ପୂର୍ବାହ୍ନ ୧୦ଟାରୁ ସଂଧ୍ୟା ୭ଟା ପର୍ଯ୍ୟନ୍ତ ଏହି ଉତ୍ସବ ଅନୁଷ୍ଠିତ ହେବ । ଗତବର୍ଷ ପରି ଏଥର ମଧ୍ୟ ଭଦ୍ରକର ବରପୁତ୍ରମାନଙ୍କ ନାମରେ ନାମିତ ଆଠ ଜଣ ବରିଷ୍ଠ ପ୍ରତିଭାଙ୍କୁ ସାଳନ୍ଦୀ ସୃଜନ ପୁରସ୍କାର ଓ ସାହିତ୍ୟର ଉତ୍ତରଣ ପାଇଁ କାର୍ଯ୍ୟରତ ପାଞ୍ଚ ଜଣ ବ୍ୟକ୍ତିବିଶେଷଙ୍କୁ ସାହିତ୍ୟସଖା ସମ୍ମାନ ପ୍ରଦାନ କରାଯିବ ।

ନୂଆବଜାରସ୍ଥିତ କର୍ମଚାରୀ ଭବନରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଉତ୍ସବର ନିର୍ଦ୍ଦେଶକ ସରୋଜ ବଳ ଏ ସଂପର୍କରେ ସୂଚନା ଦେଇ କହିଥିଲେ ଯେ ଭଦ୍ରକ ମାଟିରେ ଜନ୍ମିତ ସୁଖ୍ୟାତ ପୂର୍ବସୁରୀଙ୍କ ନାମରେ ନାମିତ ଏହିସବୁ ପୁରସ୍କାର କେବଳ ପ୍ରତିଭାପୂଜା ନୁହେଁ, ବରଂ ପରପିଢ଼ିଙ୍କୁ ପୂର୍ବପିଢ଼ି ସହିତ ଯୋଡ଼ିବାର ଏକ ବିନମ୍ର ପ୍ରୟାସ । ସାଳନ୍ଦୀ ସାହିତ୍ୟ ସଙ୍ଗମର ବିଭିନ୍ନ ସତ୍ରରେ ରାଜ୍ୟର ଭିନ୍ନଭିନ୍ନ ସ୍ଥାନରୁ ପ୍ରସିଦ୍ଧ ଲେଖକ, ସଂପାଦକ, ପ୍ରକାଶକ, ନାଟ୍ୟକାର, ଅଭିନେତା, ସଂଗୀତଜ୍ଞ ଓ ଚିତ୍ରଶିଳ୍ପୀମାନେ ଯୋଗ ଦେଉଥିବାରୁ ଏହା ସାରା ଓଡ଼ିଶାରେ ଭଦ୍ରକ ମାଟିର ସୃଜନଶୀଳ ଅସ୍ମିତା ଓ ଭାଇଚାରା ପ୍ରଦର୍ଶନରେ ସହାୟକ ହେବ । ପୁରସ୍କୃତ ଓ ସଂବର୍ଦ୍ଧିତ ପ୍ରତିଭାଙ୍କ ନାମ ଫେବୃଆରୀ ପ୍ରଥମ ସପ୍ତାହରେ ଘୋଷଣା କରାଯିବ ବୋଲି ସେ ସୂଚନା ଦେଇଥିଲେ ।

ଏହି ଅବସରରେ ଚଳିତବର୍ଷ ପାଇଁ ଦିଗ୍‍ଦର୍ଶକ ଓ କର୍ମକର୍ତ୍ତାମାନଙ୍କ ନାମ ଘୋଷଣା କରାଯାଇଥିଲା । ପୂର୍ବପରି ଗାଳ୍ପିକ ପବିତ୍ର ପାଣିଗ୍ରାହୀ ସଭାପତି ଭାବେ ଏବଂ କବି କିଶୋର ପାଣିଗ୍ରାହୀ ଓ ଗୀତିକାର ପଞ୍ଚାନନ ନାୟକ ଉପସଭାପତି ଭାବେ ଦାୟିତ୍ୱରେ ରହିବେ । ପରିଚାଳନା ସଂପାଦକ ଭାବେ ଯୁବଲେଖକ ତଥା ପ୍ରଶାସକ ସୌମ୍ୟଶ୍ରୀ ପାଣିଗ୍ରାହୀ କାର୍ଯ୍ୟଭାର ଗ୍ରହଣ କରିଥିବାବେଳେ କବି ଚିତ୍ତରଞ୍ଜନ ନାୟକ ସୃଜନଶୀଳ ସଂଯୋଜକ ଦାୟିତ୍ୱ ତୁଲାଇବେ । ଅମିତାଭ ଖିଲାର, କୈଳାଶ ବେହେରା, ସଂଗ୍ରାମ କେଶରୀ ସେନାପତି ଏବଂ ପ୍ରୀତିପଦ୍ମା ଦାସ ସହସଂଯୋଜକ ଭାବେ ଉତ୍ସବ ଆୟୋଜନରେ ସାମିଲ ହେବେ । 

ଏଥିସହିତ ବରିଷ୍ଠ ସାମ୍ବାଦିକ ତଥା କବି ଡ. ହରିହର ନାୟକ ଗଣମାଧ୍ୟମ ଉପଦେଷ୍ଟା ଏବଂ ପ୍ରମୋଦ ରାୟ ଓ ତପନ ସ୍ୱାଇଁ ଗଣମାଧ୍ୟମ ସଂଯୋଜକ ଭାବେ ଚଳିତବର୍ଷ ଏହି ଉତ୍ସବ ସହ ସଂପୃକ୍ତ ରହିବେ ।

ଡ. ରାଧାବିନୋଦ ନାୟକ, ବାସୁଦେବ ବାରିକ, ଝରଣା ପଟ୍ଟନାୟକ, ଡ. ରାଧାରାଣୀ ମହାପାତ୍ର, ଡ. ପ୍ରଭାତ ନଳିନୀ ମହାପାତ୍ର, ପୂର୍ଣ୍ଣଚନ୍ଦ୍ର ବହଳୀ, ଡା. ବିକାଶ ନାରାୟଣ ନନ୍ଦ ପ୍ରମୁଖ ପୂର୍ବପରି ସାଳନ୍ଦୀ ସାହିତ୍ୟ ସଙ୍ଗମର ସଫଳ ଆୟୋଜନ ପାଇଁ ପରାମର୍ଶ ଓ ଦିଗ୍‍ଦର୍ଶନ ଦେବେ ।

ଚଳିତ ବର୍ଷ ଜିଲ୍ଲା ସଂଯୋଜକ ଭାବେ ଅବିନାଶ ପଣ୍ଡା (ଭଦ୍ରକ), ଉତ୍ପଳ ମହାନ୍ତି (ବାଲେଶ୍ୱର), ଅଶୋକ ଚନ୍ଦ୍ର ପୁହାଣ (କେନ୍ଦୁଝର), ଅସୀମା ସାହୁ (ମୟୂରଭଞ୍ଜ), ପ୍ରଜ୍ଞା ପ୍ରବର୍ତ୍ତିକା ଦାଶ (ଯାଜପୁର) ଏବଂ ଅତୁଲ ବଳ (କେନ୍ଦ୍ରାପଡ଼ା) ଦାୟିତ୍ୱ ନିର୍ବାହ କରିବେ ବୋଲି ନିଷ୍ପତ୍ତି ନିଆଯାଇଛି ।

ବିଗତ ବର୍ଷ ପରି ସାହିତ୍ୟ, ସଙ୍ଗୀତ, ସିନେମା, ନୃତ୍ୟ, ଚିତ୍ର ଆଦି ବିଭିନ୍ନ ବିଭାଗରେ ସୃଜନଶୀଳ କାର୍ଯ୍ୟକ୍ରମ ଅନୁଷ୍ଠିତ ହେବ। ଏପରି ବିରଳ ସୃଜନପର୍ବରେ ସାମିଲ ହୋଇ ପୂର୍ବପରି ଏହାକୁ ସଫଳ କରିବାକୁ ସଙ୍ଗମର ସମସ୍ତ କର୍ମକର୍ତ୍ତା ନିବେଦନ କରିଛନ୍ତି ।

ପ୍ରଧାନମନ୍ତ୍ରୀଙ୍କ ଜୀବନ ଯାତ୍ରା ବିଶ୍ୱର ଛାତ୍ରଛାତ୍ରୀଙ୍କ ପାଇଁ ଅଧ୍ୟୟନର ବିଷୟ ହେବ - ଅମିତ ଶାହ

ବ୍ୟୁରୋ (୧୬ ଜାନୁଆରୀ ୨୦୨୫) – ଗୁଜୁରାଟର ବଡନଗରରେ ଜନ୍ମ ଗ୍ରହଣ କରିଥିବା ଜଣେ ସାଧାରଣ ପିଲାରୁ ବିଶ୍ୱ ନେତା ପର୍ଯ୍ୟନ୍ତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଜୀବନ ଯାତ୍ରା ଆଗାମୀ ଦିନରେ ଦେଶ ଦୁନିଆର ଛାତ୍ରଛାତ୍ରୀଙ୍କ ପାଇଁ ଏକ ଅଧ୍ୟୟନର ବିଷୟ ହେବ । ଗୁରୁବାର ଗୁଜରାଟର ବଡନଗର ଠାରେ ଏକ ଅତ୍ୟାଧୁନିକ ପ୍ରତ୍ନତତ୍ତ୍ୱିକ ଅନୁଭୂତି ସଂଗ୍ରହାଳୟ, ପ୍ରେରଣା କମ୍ପ୍ଲେକ୍ସ ଏବଂ ଓ୍ୱାଡନଗର କ୍ରୀଡ଼ା କମ୍ପ୍ଲେକ୍ସକୁ ଉଦଘାଟନ କରିବା ଅବସରରେ କହିଛନ୍ତି କେନ୍ଦ୍ର ଗୃହ ମନ୍ତ୍ରୀ ଅମିତ ଶାହା ।

କେନ୍ଦ୍ର ଗୃହ ମନ୍ତ୍ରୀ କହିଛନ୍ତି ଯେ ଆଜି ସମଗ୍ର ବିଶ୍ୱ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପଦାନୁସରଣ କରୁଛି । ଆଜିର କାର୍ଯ୍ୟକ୍ରମ ମୋଦୀଙ୍କ ଜନ୍ମସ୍ଥାନରେ ଅନୁଷ୍ଠିତ ହେଉଛି । ଏହି କାର୍ଯ୍ୟକ୍ରମ ବଡନଗରକୁ ବିଭିନ୍ନ ଦୃଷ୍ଟିକୋଣରୁ ଦେଶ ଓ ବିଶ୍ୱର ମାନଚିତ୍ରରେ ସ୍ଥାନିତ କରିବାକୁ ଯାଉଛି। ବଡନଗର ହେଉଛି ବିଶ୍ୱର ଅନ୍ୟତମ ପୁରାତନ ସହର । ଏହା ପ୍ରତ୍ୟେକ ଯୁଗର ସଂସ୍କୃତି ଏବଂ ମୂଲ୍ୟବୋଧକୁ ପ୍ରଭାବିତ କରିଛି ।

ଏହି କାର୍ଯ୍ୟକ୍ରମରେ ସାମିଲ ହୋଇଥିବା କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ ହଜାର ହଜାର ବର୍ଷ ପୁରୁଣା ସଭ୍ୟତାର କେନ୍ଦ୍ରସ୍ଥଳ ବଡନଗରର ତପୋଭୂମି ଆଜି ନୂଆ ରୂପ ନେଉଛି । ଐତିହାସିକ ଐତିହ୍ୟର ଏହି ଭୂମିକୁ ଏକବିଂଶ ଶତାବ୍ଦୀରେ ଭାରତର ନେତୃତ୍ୱ ନେବାର ସୌଭାଗ୍ୟ ପ୍ରାପ୍ତ ହୋଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଭାରତ ସହିତ ଗ୍ଲୋବାଲ ସାଉଥର ସ୍ୱର ହୋଇଛନ୍ତି । ଏହା ହେଉଛି ବଡନଗରର ସଂସ୍କାର । ଏହି ଅଞ୍ଚଳର ବିଚାର, ଯାହାର ଛତ୍ରଛାୟାରେ ସମଗ୍ର ବିଶ୍ୱର ଲୋକମାନେ ଲାଭ ପାଉଛନ୍ତି । ଯେଉଁ ସ୍କୁଲରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରାଥମିକ ଶିକ୍ଷା ଗ୍ରହଣ କରିଥିଲେ, ସେହି ଠାରେ ଲୋକାର୍ପିତ 'ପ୍ରେରଣା କମ୍ପଲେକ୍ସ' ଜାତୀୟ ଶିକ୍ଷା ନୀତି ଅନୁଯାୟୀ ପାଠ୍ୟକ୍ରମ ମାଧ୍ୟମରେ ଆମ ପିଲାମାନଙ୍କ ମଧ୍ୟରେ ନେତୃତ୍ୱର ଗୁଣାତ୍ମକ ଏବଂ ମୂଲ୍ୟବୋଧ ବିକାଶ କରିବାର ଏକ ଜରିଆ ହେବ । ଏହି ଆଧୁନିକ ସଂଗ୍ରହାଳୟରେ ବଡନଗର ପ୍ରାଚୀନ ସଂସ୍କୃତି ଏବଂ ଇତିହାସର ଛାପ ରହିଛି । ଏହା ବିଶ୍ୱର ଏକମାତ୍ର ଅତ୍ୟାଧୁନିକ ସଂଗ୍ରହାଳୟ । ବଡନଗର ଆମର ସମୃଦ୍ଧ ଐତିହ୍ୟ । ଆଗାମୀ ଦିନରେ ଏହି ଭୂମି ଆମର ଯୁବପିଢ଼ିଙ୍କୁ ଗର୍ବିତ କରିବା ସହିତ ଏକ ବିକଶିତ ଭାରତ ନିର୍ମାଣ ପାଇଁ ପ୍ରେରଣା ଯୋଗାଇବ ।

ଆଜି ପ୍ରେରଣା ବିଦ୍ୟାଳୟର ୪୨ତମ ବ୍ୟାଚର ଛାତ୍ରଛାତ୍ରୀଙ୍କ ସହ ମଧ୍ୟ କେନ୍ଦ୍ରମନ୍ତ୍ରୀ ଶାହ ଆଲୋଚନା କରିଥିଲେ । ଏ ସମ୍ପର୍କରେ କେନ୍ଦ୍ର ଶିକ୍ଷା ମନ୍ତ୍ରୀ ଟ୍ୱିଟ୍ କରିଛନ୍ତି ଯେ ଏହି ଆଲୋଚନା କେବଳ ଛାତ୍ରଛାତ୍ରୀଙ୍କ ପାଇଁ ଜ୍ଞାନଦାୟକ ନଥିଲା, ବରଂ ତାଙ୍କ ଭିତରେ ନୂତନ ଶକ୍ତି ଏବଂ ଚିନ୍ତାଧାରା ମଧ୍ୟ ସୃଷ୍ଟି କରିଥିଲା । ଏହି ପ୍ରେରଣାଦାୟୀ ଆଲୋଚନା ସେମାନଙ୍କ ବ୍ୟକ୍ତିତ୍ୱ ଏବଂ ଦୃଷ୍ଟିକୋଣକୁ ବ୍ୟାପକ କରିବାରେ ସାହାଯ୍ୟ କରିବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରାରମ୍ଭିକ ଶିକ୍ଷା ଗ୍ରହଣ କରିଥିବା ପ୍ରେରଣା ବିଦ୍ୟାଳୟ ଆଜି ଶିକ୍ଷା ଓ ମୂଲ୍ୟବୋଧର ଏକ ଅନନ୍ୟ କେନ୍ଦ୍ରରେ ପରିଣତ ହୋଇଛି । ଅଭିଜ୍ଞତା ଭିତ୍ତିକ, ଅଭିନବ ଓ ମୂଲ୍ୟବୋଧ ଭିତ୍ତିକ ଶିକ୍ଷା ବ୍ୟବସ୍ଥା ଛାତ୍ରଛାତ୍ରୀଙ୍କୁ ବିଶ୍ୱ ମଞ୍ଚରେ ଉତ୍କୃଷ୍ଟ ହେବା ପାଇଁ ପ୍ରସ୍ତୁତ କରୁଛି। ନୂତନ ପିଢ଼ିଙ୍କୁ ଅନୁଭୂତିମୂଳକ ଓ ସାମଗ୍ରିକ ଶିକ୍ଷା ପ୍ରଦାନ କରି ଭବିଷ୍ୟତର ଦକ୍ଷ ନେତାଙ୍କୁ ଗଢ଼ିତୋଳିବା ପାଇଁ ଏହି ବିଦ୍ୟାଳୟ କାର୍ଯ୍ୟ କରୁଛି। ମାନ୍ୟବର ଗୃହମନ୍ତ୍ରୀଙ୍କ ସହ ଏହି ବାର୍ତ୍ତାଳାପ ଛାତ୍ରଛାତ୍ରୀଙ୍କ ମଧ୍ୟରେ ଆତ୍ମବିଶ୍ୱାସ, ଦେଶପ୍ରେମ ଏବଂ ସମାଜ ପ୍ରତି ଦାୟିତ୍ୱବୋଧକୁ ସୁଦୃଢ଼ କରି 'ବିକଶିତ ଭାରତ' ଗଠନ ପାଇଁ ପ୍ରେରଣା ଯୋଗାଇବ । ଏହି ସମାରୋହରେ ଗୁଜୁରାଟ ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ ମଧ୍ୟ ଉପସ୍ଥିତ ଥିଲେ ।

ନିଖିଳ ଉତ୍କଳ ସଂସ୍କୃତ ମହାମଣ୍ଡଳର ସାଧାରଣ ସମ୍ପାଦକଙ୍କ ବିୟୋଗରେ ଶୋକସଭା

 

ଭଦ୍ରକ (୧୧ ଜାନୁଆରୀ ୨୦୨୪): ଆଜି ଭଦ୍ରକ ପୁରୁଣା ବଜାର ସ୍ଥିତ ଦାମୋଦର ସଂସ୍କୃତ ବିଦ୍ୟାଳୟ ପରିସରରେ ଭଦ୍ରକ ସଂସ୍କୃତ ମଣ୍ଡଳ ଦ୍ୱାରା ନିଖିଳ ଉତ୍କଳ ସଂସ୍କୃତ ମହାମଣ୍ଡଳର ଦିବଂଗତ ସାଧାରଣ ସମ୍ପାଦକ ଡ. ଚିତ୍ତରଞ୍ଜନ ଷଡ଼ଙ୍ଗୀଙ୍କ ଅକାଳ ବିୟୋଗରେ ଶୋକସଭା ଆୟୋଜନ କରାଯାଇଥିଲା । ଉକ୍ତ ସଭାରେ ସଭାପତିତ୍ୱ କରିଥିଲେ ଭଦ୍ରକ ସଂସ୍କୃତ ମଣ୍ଡଳର ସଭାପତି ଅଭିମନ୍ୟୁ ସେନାପତି । ଏହି ସଭାରେ ଦାମୋଦର ମହାବିଦ୍ୟାଳୟ ଉପଶାସ୍ତ୍ରୀର ଅଧକ୍ଷ ଡ. ପ୍ରମୋଦ କୁମାର ନାୟକ, ଅବସରପ୍ରାପ୍ତ ପଣ୍ଡିତ ନିତ୍ୟାନନ୍ଦ ମିଶ୍ର, ସମ୍ପାଦକ ସତ୍ୟନାରାୟଣ ପାଢ଼ୀ, ଦାମୋଦର ଟୋଲ୍‌ର ପ୍ରଧାନ ପଣ୍ଡିତ ଅକ୍ଷୟ କୁମାର ପାଣିଗ୍ରାହୀ ଆଦି ଦିବଂଗତ ବ୍ୟକ୍ତିତ୍ୱଙ୍କ ଉଦ୍ଦେଶ୍ୟରେ ସମ୍ଭାଷଣ ପ୍ରଦାନ କରିଥିଲେ ।

ଭଦ୍ରକ ମଣ୍ଡଳର ଅନ୍ୟତମ ସଦସ୍ୟମାନଙ୍କ ମଧ୍ୟରେ ପୂର୍ଣ୍ଣଚନ୍ଦ୍ର ନାୟକ, ବିନୟ କୁମାର ଦାସ, ମଞ୍ଜୁଲତା ମହାପାତ୍ର, ଗୌରାଙ୍ଗ ଚରଣ ଦାସ, ଯଶୋବନ୍ତ ମିଶ୍ର ଆଦି ସଭାରେ ଯୋଗ ଦେଇଥିଲେ । ସଂସ୍କୃତ ମହାବିଦ୍ୟାଳୟ ଶାସ୍ତ୍ରୀର ଅଧକ୍ଷ ଡ. ନିତ୍ୟାନନ୍ଦ ମିଶ୍ର, ଅଧ୍ୟାପକ ଶୁକଦେବ ପଣ୍ଡା, ଚିତ୍ତରଞ୍ଜନ ଦାସ, ରଘୁନାଥ ନାୟକ ପ୍ରମୁଖ ଯୋଗ ଦେଇଥିଲେ । ସଭା ପରିଚାଳନାରେ ସହଯୋଗ କରିଥିଲେ ସଂଗ୍ରାମ କେଶରୀ ସେନାପତି ।

ପୋଲାଣ୍ଡର କାଟୋଭିସଠାରେ ଉଇକିମାନିଆ ୨୦୨୪ରେ ଓଡ଼ିଆ ଓ ସାନ୍ତାଳୀ ଉଇକିଆଳିଙ୍କ ଯୋଗଦାନ

 

ଭୁବନେଶ୍ୱର (୯ ଅଗଷ୍ଟ ୨୦୨୪): ଉଇକିମିଡ଼ିଆ ସମୁଦାୟ ତଥା ଉଇକିପିଡ଼ିଆର ବାର୍ଷିକ ଉତ୍ସବ ଭାବରେ ପାଳନ କରାଯାଉଥିବା ଆନ୍ତର୍ଜାତୀୟ କାର୍ଯ୍ୟକ୍ରମ ଉଇକିମାନିଆ, ଏଥର ପୋଲାଣ୍ଡର କାଟୋଭିସଠାରେ ଆୟୋଜନ କରାଯାଇଛି, ଯେଉଁଥିରେ ଓଡ଼ିଶାରୁ ଉଭୟ ଓଡ଼ିଆ ଓ ସାନ୍ତାଳି ଉଇକିଆଳିମାନେ (ଉଇକିପିଡ଼ିଆରେ ସ୍ୱେଚ୍ଛାସେବୀ ଭାବରେ ଲେଖୁଥିବା ବ୍ୟକ୍ତି) ଯୋଗ ଦେଇଛନ୍ତି । ପ୍ରତିବର୍ଷ ଅଗଷ୍ଟ ମାସରେ ପାଳନ କରାଯାଉଥିବା ଏହି କାର୍ଯ୍ୟକ୍ରମ ଏହି ବର୍ଷ ୭ ରୁ ୧୦ ଅଗଷ୍ଟ ଯାଏଁ ଚାରିଦିନ ବ୍ୟାପି ଚାଲିବ ।

ଓଡ଼ିଆ ଉଇକିମିଡ଼ିଆନ୍ସ ଇଉଜର୍ ଗ୍ରୁପ୍‌ର ସଦସ୍ୟ ସୁଭାସିସ ପାଣିଗ୍ରାହୀ, ଚିନ୍ମୟୀ ମିଶ୍ର ଓ ଅଲିଭା ସାହୁ ପ୍ରତିନିଧିତ୍ୱ କରିଥିଲେ । ବୃତ୍ତିରେ ଜଣେ ଇଞ୍ଜିନିୟର ତଥା ଉତ୍ସାହୀ ଉଇକିମିଡ଼ିଆନ୍ ଚିନ୍ମୟୀ ମିଶ୍ର ୨୦୧୫ ମସିହାରେ ଉଇକିମିଡ଼ିଆରେ ଯୋଗ ଦେଇଥିଲେ । ଭେଦଭାବ କିମ୍ବା ପକ୍ଷପାତରୁ ମୁକ୍ତ ହୋଇ ସମସ୍ତଙ୍କୁ ଆଗକୁ ବଢ଼ିବାର ଯଥେଷ୍ଟ ସୁଯୋଗ ଥିବା ଏକ ସମାବେଶୀ ସ୍ଥାନ ସୃଷ୍ଟି କରିବାର ପ୍ରୟାସ ପାଇଁ ସେ ଜଣାଶୁଣା । ଚିନ୍ମୟୀ ଏଥର ଉଇକିମାନିଆରେ ଚାରୋଟି କାର୍ଯ୍ୟକ୍ରମରେ ଭାଗ ନେଇଥିବା ବେଳେ ଉଇକି ଓମେନ୍ସ କ୍ୟାମ୍ପ ପାଇଁ ବିଶେଷ ଉପସ୍ଥାପନ କରିଛନ୍ତି ।

୨୦୧୫ ମସିହାରେ ଉଇକିମିଡ଼ିଆରେ ଯୋଗ ଦେଇଥିବା ଅନ୍ୟତମ ସକ୍ରିୟ ଉଇକିଆଳି ଅଳିଭା ସାହୁ ଓଡ଼ିଆ ଓ ହିନ୍ଦୀ ଉଇକିପିଡ଼ିଆରେ ସକ୍ରିୟ ଅବଦାନ କରି ଆସୁଛନ୍ତି । ସେ ଉଇକିମିଡ଼ିଆ କମନ୍ସ, ଓଡ଼ିଆ ଉଇକିପାଠାଗାର ଓ ଉଇକିଡାଟାରେ ମଧ୍ୟ ଅବଦାନ କରନ୍ତି । ଉଇକିମିଡ଼ିଆ ଡଚ୍‌ଲ୍ୟାଣ୍ଡର ସହାୟତାରେ ଅଲିଭା ପ୍ରଥମ କରି ଉଇକିମାନିଆରେ ଯୋଗ ଦେବାର ସୁଯୋଗ ପାଇଛନ୍ତି ।

ଏଥର ଉଇକିମାନିଆରେ ସାନ୍ତାଳୀ ଉଇକିପିଡ଼ିଆର ପ୍ରତିନିଧିତ୍ୱ କରୁଥିବା ରାମଜିତ ଟୁଡୁ, ଉଭୟ ଓଡ଼ିଆ ଓ ସାନ୍ତାଳୀ ଉଇକିପିଡ଼ିଆରେ ଜଣେ ସକ୍ରିୟ ସଦସ୍ୟ । ସେ ସାନ୍ତାଳୀ ଉଇକିପିଡ଼ିଆର ପ୍ରତିଷ୍ଠା ତଥା ଦ୍ରୁତ ଅଭିବୃଦ୍ଧି ପାଇଁ ପ୍ରମୁଖ ଭୂମିକା ଗ୍ରହଣ କରିଛନ୍ତି । ସିଆଇଏସ୍-ଏ୨କେ ପକ୍ଷରୁ ଦିଆଯାଇଥିବା ସ୍କଲାରସିପ୍ ଜରିଆରେ ସେ ଏହି କାର୍ଯ୍ୟକ୍ରମରେ ଯୋଗ ଦେଇଛନ୍ତି । ଉଇକିପିଡ଼ିଆ ସହିତ ତାଙ୍କର ନିଜସ୍ୱ ଅନୁଷ୍ଠାନ ଓଲଚିକିଟେକ୍ ଓ ବୀରମାଳି ସାନ୍ତାଳୀ ଇ-ପତ୍ରିକା ଅଛି ଯେଉଁଥିରେ ସେ ସାନ୍ତାଳୀ ଭାଷାର ଡିଜିଟାଲ ସଶକ୍ତୀକରଣ ପାଇଁ ପ୍ରୟାସ ଜାରି ରଖିଛନ୍ତି ।

ଓଡ଼ିଆ ଉଇକିପିଡ଼ିଆରେ ଦୀର୍ଘଦିନ ଧରି ଯୋଗଦାନ କରି ଆସୁଥିବା ଶୈଳେଶ କ୍ରିଏଟିଭ୍ କମନ୍ସ ଲାଇସେନ୍ସରେ ଓଡ଼ିଆ ବିଷୟବସ୍ତୁ ଉପଲବ୍ଧ କରାଇବା ପାଇଁ ସରକାରଙ୍କ ସହ ମିଶି ଅନେକ କାର୍ଯ୍ୟ କରିଛନ୍ତି । ସେ ଏବେ ଉଇକିମିଡ଼ିଆ ଫାଉଣ୍ଡେସନ୍‌ର ଜଣେ କର୍ମଚାରୀ ଭାବରେ କାର୍ଯ୍ୟ କରୁଛନ୍ତି । ଓଡ଼ିଆ ଉଇକିପିଡ଼ିଆର ପରିଚ୍ଛା ସୁଭାସିଷ ପାଣିଗ୍ରାହୀ ୨୦୧୧ ମସିହାରୁ ଓଡ଼ିଆ ଉଇକିପିଡ଼ିଆରେ କାମ କରି ଆସୁଛନ୍ତି । ତାଙ୍କ ଉଦ୍ୟମରେ ୨୦୦୨ରୁ ପ୍ରଥମ ଦକ୍ଷିଣ ଏସୀୟ ଭାଷା ଭାବରେ ଉପଲବ୍ଧ ଥିବା ଓଡ଼ିଆ ଉଇକିପିଡ଼ିଆ ସକ୍ରିୟ ହୋଇଥିଲା । ଉଇକିପିଡ଼ିଆ ବ୍ୟତୀତ ଉଇକିପାଠାଗାର, ଉଇକିଡାଟା, ଲିଙ୍ଗୁଆ ଲିବ୍ରେରେ ତାଙ୍କର ବିଳିଷ୍ଠ ଯୋଗଦାନ ରହିଛି, ଯାହାକି ଓଡ଼ିଆ ଭାଷାକୁ ଇଣ୍ଟରନେଟ୍ ତଥା ଡିଜିଟାଲ୍ ଯୁଗରେ ସମୃଦ୍ଧ କରିବାରେ ପ୍ରମୁଖ ଭୂମିକା ଗ୍ରହଣ କରିଛି ।

ଏହି ଆନ୍ତର୍ଜାତୀୟ କାର୍ଯ୍ୟକ୍ରମ ଉଇକିମାନିଆ ସମ୍ମିଳନୀରେ ଓଡ଼ିଶାର ଏହି ଉଇକିଆଳିଙ୍କ ଅଂଶଗ୍ରହଣ ଉଇକିମିଡ଼ିଆ ଇକୋସିଷ୍ଟମରେ ଓଡ଼ିଆ ଓ ସାନ୍ତାଳୀ ଭାଷା ସମ୍ପ୍ରଦାୟର ବଢ଼ୁଥିବା ଯୋଗଦାନ ଓ ଅବଦାନର ପ୍ରମାଣ । ଏହି ସମ୍ମାନଜନକ କାର୍ଯ୍ୟକ୍ରମରେ ସେମାନଙ୍କ ଉପସ୍ଥିତି ସେମାନଙ୍କ ଅନୁଭୂତି ବାଣ୍ଟିବା, ବିଶ୍ୱ ସମୁଦାୟଠାରୁ ଶିଖିବା ତଥା ଉଇକିମିଡ଼ିଆ ଆନ୍ଦୋଳନର ବହୁଭାଷୀ ପ୍ରୟାସକୁ ଆହୁରି ସୁଦୃଢ଼ କରିବାର ସୁଯୋଗ ପ୍ରଦାନ କରେ ।

ଏନ୍‌ଆଇଟି ରାଉରକେଲାରେ ଓଏସ୍‌ଆର୍‌ଟିସି ପେସାଦାରମାନଙ୍କ ପାଇଁ କ୍ୟାପାସିଟି ବିଲ୍ଡିଂ କୋର୍ସର ଦ୍ୱିତୀୟ ପର୍ଯ୍ୟାୟ ଆରମ୍ଭ

ରାଉରକେଲା (୧୦ ଜୁଲାଇ ୨୦୨୪): ଓଏସ୍‌ଆର୍‌ଟିସି (ଓଡ଼ିଶା ରାଜ୍ୟ ସଡ଼କ ପରିବହନ ନିଗମ)ର ପେସାଦାରମାନଙ୍କ ପାଇଁ ୬ ଦିନିଆ ଆବାସିକ ପ୍ରଶିକ୍ଷଣ କାର୍ଯ୍ୟକ୍ରମ (ଜୁଲାଇ ୧୦ରୁ ୧୫ ଯାଏଁ) ଆଜି ଏନ୍ଆଇଟି ରାଉରକେଲାରେ ଆରମ୍ଭ ହୋଇଛି । ମେକାନିକାଲ ଇଞ୍ଜିନିୟରିଂ ବିଭାଗ ପକ୍ଷରୁ ଆୟୋଜିତ ଏହି ଦକ୍ଷତା ବିକାଶ ପାଠ୍ୟକ୍ରମ ବିଭାଗର ସେମିନାର୍ ହଲ୍‌ରେ ଅନୁଷ୍ଠିତ ହେଉଛି । ଓଏସ୍‌ଆର୍‌ଟିସି ଇଞ୍ଜିନିୟର ଏବଂ ଅଧିକାରୀଙ୍କ ପାଇଁ ଜୁନ୍ ୨୦୨୪ ରେ ଅନୁଷ୍ଠିତ ପ୍ରଥମ ପର୍ଯ୍ୟାୟ ପାଠ୍ୟକ୍ରମ ପରେ ଏହି ଦ୍ୱିତୀୟ ପର୍ଯ୍ୟାୟ ପାଠ୍ୟକ୍ରମ ବିଶେଷ କରି ଓଏସ୍‌ଆର୍‌ଟିସି ଡିପୋ ମ୍ୟାନେଜରଙ୍କ ପାଇଁ ଡିଜାଇନ୍ କରାଯାଇଛି ।

ଆଜି, ଜୁନ୍ ୧୦, ୨୦୨୪ରେ ଉଦ୍‌ଘାଟନୀ ଅଧିବେଶନ ସହିତ ଏହି କାର୍ଯ୍ୟକ୍ରମ ଆରମ୍ଭ ହୋଇଥିଲା । ପାଠ୍ୟକ୍ରମ ସଂଯୋଜକ ପ୍ରଫେସର୍ ବୁକ୍କେ କିରଣ ନାଏକ ସମସ୍ତ ୩୧ ଜଣ ପ୍ରତିଯୋଗୀଙ୍କୁ ସ୍ୱାଗତ କରିବା ସହ ଦକ୍ଷତା ବୃଦ୍ଧି ପାଠ୍ୟକ୍ରମରେ ଯାନ ପରିଚାଳନା, ଡିପୋ ପରିଚାଳନା, ପରିବହନ ନୀତି ଓ ସ୍ଥାୟୀ ପରିବହନ ଅଭ୍ୟାସରେ ଦକ୍ଷତା ବୃଦ୍ଧି ପାଇଁ ପ୍ରସ୍ତୁତ କରାଯାଇଥିବା ଏକ ବିବିଧ ପାଠ୍ୟକ୍ରମ ରହିବ ବୋଲି ଆଲୋକପାତ କରିଥିଲେ । ଏହାବ୍ୟତୀତ ଏହି ପାଠ୍ୟକ୍ରମରେ ବସ୍ ଏୟାର କଣ୍ଡିସନିଂ ସ୍ଥାପନ ଓ ବସ୍ ଡିପୋରେ ସିସିଟିଭି କ୍ୟାମେରାର ରକ୍ଷଣାବେକ୍ଷଣ ଆଦି ବାବାଦରେ ଶିକ୍ଷା ପ୍ରଦାନ କରାଯିବ ।

ଉଦ୍‌ଘାଟନୀ ଭାଷଣରେ ପ୍ରଫେସର ଏସ୍.କେ. ପ୍ରତିହାର (ପ୍ରାୟୋଜିତ ଗବେଷଣା, ଶିଳ୍ପ ପରାମର୍ଶ ଓ ନିରନ୍ତର ଶିକ୍ଷାର ଡିନ୍) ଆଲୋକପାତ କରିଥିଲେ ଯେ ଏହି ପାଠ୍ୟକ୍ରମର ବ୍ୟାପକ ପାଠ୍ୟଖସଡ଼ା ଆଧୁନିକ ପରିବହନ ବ୍ୟବସ୍ଥାରେ ଓଏସ୍‌ଆର୍‌ଟିସି ପେସାଦାରଙ୍କ ଦକ୍ଷତା ବୃଦ୍ଧି କରିବ, ପାରଦର୍ଶିତା ତଥା ପରିବେଶ ଦାୟିତ୍ୱକୁ ପ୍ରୋତ୍ସାହିତ କରିବ । ସେ ଏହା ମଧ୍ୟ ଉଲ୍ଲେଖ କରିଛନ୍ତି ଯେ ଏହି ଅଧିବେଶନରେ ଅଂଶଗ୍ରହଣକାରୀଙ୍କ ପାଇଁ ପାଠ୍ୟକ୍ରମ ବିଶେଷଜ୍ଞଙ୍କ ସହ ଆଲୋଚନା କରିବା ପାଇଁ ନୂତନ, ଆକର୍ଷଣୀୟ ବିଷୟ ଅନ୍ତର୍ଭୁକ୍ତ ଅଟେ ।

ପ୍ରତିଯୋଗୀମାନଙ୍କୁ ସମ୍ବୋଧିତ କରି ମେକାନିକାଲ ଇଞ୍ଜିନିୟରିଂ ବିଭାଗର ମୁଖ୍ୟ ପ୍ରଫେସର ଏସ୍.କେ. ପଟେଲ ଏହି ପାଠ୍ୟକ୍ରମ ଆୟୋଜନ ପାଇଁ ଓଡ଼ିଶା ସରକାରଙ୍କୁ ସେମାନଙ୍କ ବିଭାଗ ଚୟନ କରିଥିବାରୁ କୃତଜ୍ଞତା ଜ୍ଞାପନ କରିଥିଲେ । ସେ କହିଥିଲେ, "ପ୍ରଥମ ପର୍ଯ୍ୟାୟ ଅଂଶଗ୍ରହଣକାରୀଙ୍କ ମତାମତ ଅତ୍ୟନ୍ତ ସନ୍ତୋଷଜନକ ଥିଲା । ୬୩ ବର୍ଷ ପୂର୍ବେ ସ୍ଥାପିତ ଆମ ବିଭାଗରେ ରାଜ୍ୟ ଓ କେନ୍ଦ୍ର ସରକାରଙ୍କ ପ୍ରଶାସନିକ ଭୂମିକାରେ କାର୍ଯ୍ୟ କରୁଥିବା ଅନେକ ପୂର୍ବତନ ଛାତ୍ରଛାତ୍ରୀଙ୍କୁ ଗର୍ବର ସହ ଗଣନା କରାଯାଏ । ଉଦାହରଣ ସ୍ୱରୂପ, ନିକଟରେ ଓଡ଼ିଶା ମୁଖ୍ୟମନ୍ତ୍ରୀଙ୍କ ଅତିରିକ୍ତ ମୁଖ୍ୟ ଶାସନ ସଚିବ ଭାବେ ନିଯୁକ୍ତ ଶ୍ରୀ ନିକୁଞ୍ଜ ବିହାରୀ ଧଳ ଓ ଓଡ଼ିଶାର ଏସ୍‌ଏସ୍‌ଇପିଡିର ପ୍ରମୁଖ ସଚିବ ଆଇଏଏସ୍ ବିଷ୍ଣୁପଦ ସେଠୀ ଆମ ବିଭାଗର ଉଲ୍ଲେଖନୀୟ ପୂର୍ବତନ ଛାତ୍ର ଅଟନ୍ତି ।

ଏନ୍‌ଆଇଟି ରାଉରକେଲା ପ୍ରଶାସନକୁ ଧନ୍ୟବାଦ ଅର୍ପଣ କରି ଶ୍ରୀ ଲକ୍ଷ୍ମୀକାନ୍ତ ସେଠୀ, ଅତିରିକ୍ତ ଶାସନ ସଚିବ (ଓଏସ୍‌ଆର୍‌ଟିସି), ଭୁବନେଶ୍ୱର କହିଛନ୍ତି ଯେ, ଏହି ପାଠ୍ୟକ୍ରମ ଆମର ଓଏସ୍‌ଆର୍‌ଟିସି ପେସାଦାରମାନଙ୍କୁ ମାର୍ଗଦର୍ଶନ ଓ ଆକାର ପ୍ରଦାନରେ ସହାୟକ ହୋଇଛି, ସେମାନଙ୍କୁ ସେମାନଙ୍କ କାର୍ଯ୍ୟରେ ମାଲିକାନା ତଥା ଉତ୍ତରଦାୟିତ୍ୱ ନେବାରେ ସାହାଯ୍ୟ କରିଛି । ଏକ ସମୟ ଥିଲା ଯେତେବେଳେ ଓଏସ୍‌ଆର୍‌ଟିସି ଘରୋଇ କମ୍ପାନୀମାନଙ୍କୁ ବିକ୍ରିର ଦ୍ୱାରଦେଶରେ ଥିଲା, କିନ୍ତୁ ମୁଁ ଖୁସିରେ କହୁଛି ଯେ ଆମେ ବର୍ତ୍ତମାନ ୩,୦୦୦ ଗାଡ଼ି ସହିତ କାର୍ଯ୍ୟ କରୁଛୁ । ଆମେ ଆମର ପରିଶ୍ରମୀ ଓଏସ୍‌ଆର୍‌ଟିସି ପେସାଦାରମାନଙ୍କ ପାଇଁ ଦକ୍ଷତା ବିକାଶ ପାଠ୍ୟକ୍ରମ ପ୍ରଦାନ କରିବାକୁ ଯୋଜନା କରୁଛୁ ଏବଂ ଏନ୍‌ଆଇଟି ରାଉରକେଲାରେ ଏହି ଦକ୍ଷତା ବିକାଶ ପାଠ୍ୟକ୍ରମର ତୃତୀୟ ପର୍ଯ୍ୟାୟକୁ ଉତ୍ସାହର ସହ ଅପେକ୍ଷା କରୁଛୁ ।"

ଉଦ୍‌ଘାଟନୀ ଉତ୍ସବରେ ଏନ୍ଆଇଟି ରାଉରକେଲାର ନିର୍ଦେଶକ ପ୍ରଫେସର କେ. ଉମାମହେଶ୍ୱର ରାଓ ଯୋଗଦେଇ ଦେଶର ବିଭିନ୍ନ ବସ୍ ଡିପୋ ମ୍ୟାନେଜମେଣ୍ଟ୍ ପକ୍ଷରୁ ବିଭିନ୍ନ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଆଲୋକପାତ କରିଥିଲେ । ସେ କହିଥିଲେ, "ଏହିଭଳି କାର୍ଯ୍ୟକ୍ରମ ଆରମ୍ଭ କରିବାର ପ୍ରାଥମିକ ଲକ୍ଷ୍ୟ ହେଉଛି ଯାତ୍ରୀଙ୍କ ସୁରକ୍ଷା ଓ ଆରାମ ସୁନିଶ୍ଚିତ କରିବା । ଭାରତରେ ବସ୍‌ଗୁଡ଼ିକ ମୁଖ୍ୟତଃ ପର୍ଯ୍ୟଟନ ପରିବର୍ତ୍ତେ ଆବଶ୍ୟକତା ପାଇଁ ବ୍ୟବହୃତ ହୁଏ, ଯାହାଫଳରେ ଅଧିକାଂଶ ସମୟରେ ଅତ୍ୟଧିକ ଭିଡ଼ ଓ ବିଳମ୍ବ ତଥା ପର୍ଯ୍ୟାପ୍ତ ଅସୁବିଧା ଉପୁଜି ଥାଏ । ସ୍ୱୟଂଚାଳିତ ଷ୍ଟିୟରିଂ କାର୍ଯ୍ୟକାରୀ କରିବା, ବାରମ୍ବାର ହର୍ଣ୍ଣ ବଜାଇବା ସମୟରେ ଶବ୍ଦ ସ୍ତର ମାପିବା, ଯାତ୍ରୀଙ୍କ ପାଇଁ ସିଟ୍ ବେଲ୍ଟ ଯୋଗାଇବା, ହାଇଡ୍ରୋଲିକ୍ ବ୍ରେକ୍ ସିଷ୍ଟମ ପ୍ରଚଳନ କରିବା ଏବଂ ତୈଳ ଲିକ୍‌କୁ ନିୟନ୍ତ୍ରଣ କରିବା ଉପରେ ଆମକୁ ଧ୍ୟାନ ଦେବାକୁ ପଡ଼ିବ । ଏହାବ୍ୟତୀତ, ସାମଗ୍ରିକ ଦକ୍ଷତାରେ ଉନ୍ନତି ଆଣିବା ପାଇଁ ସ୍ମାର୍ଟ ସିଡ୍ୟୁଲିଂ ପାଇଁ ଆମର କାର୍ଯ୍ୟସୂଚୀକୁ ସୁବ୍ୟବସ୍ଥିତ କରିବା ଏବଂ ଡାଟା ତଥା ଡିଜିଟାଲ ଉପକରଣର ଉପଯୋଗ କରିବା ଆବଶ୍ୟକ ଅଟେ ।"

ପାଠ୍ୟକ୍ରମ ସଂଯୋଜକ ପ୍ରଫେସର ଏସ୍. ମୁର୍ଗନ ୬ ଦିନିଆ ପାଠ୍ୟକ୍ରମର କାର୍ଯ୍ୟସୂଚୀ ସମ୍ପର୍କରେ ବିସ୍ତୃତ ବିବରଣୀ ଦେବା ସହ ଧନ୍ୟବାଦ ଅର୍ପଣ କରି କାର୍ଯ୍ୟକ୍ରମ ଶେଷ କରିଥିଲେ । ଏହି ପାଠ୍ୟକ୍ରମରେ 'ବସ୍ ଡିପୋ ମ୍ୟାନେଜମେଣ୍ଟ୍' (ଇନ୍ଧନ, ଟ୍ରାଫିକ୍, ଯାନ, ଇନ୍ଭେଣ୍ଟରୀ, ସୁବିଧା, କର୍ମଚାରୀ ଓ ସମୟ ନିର୍ଦ୍ଧାରଣ ପରିଚାଳନା), 'ଯାନ ପରିଚାଳନା' (ଅଫ୍-ରୋଡ୍, ହାଇବ୍ରିଡ୍ ଓ ସ୍ୱୟଂଚାଳିତ ଯାନ), 'ସ୍ଥାୟୀ ପରିବହନ' (ପରିବେଶ ପ୍ରଭାବ, ନୀତି ବିକାଶ, ମାମଲା ଅଧ୍ୟୟନ, ବିକଳ୍ପ ଇନ୍ଧନ/ପାୱାର ବସ୍) ଏବଂ 'ଷ୍ଟ୍ରେସ୍ ମ୍ୟାନେଜମେଣ୍ଟ' (ସୁସ୍ଥ କାର୍ଯ୍ୟ ପରିବେଶ, ସମୟ ପରିଚାଳନା, ବିଶ୍ରାମ କୌଶଳ) ଅନ୍ତର୍ଭୁକ୍ତ ହେବ । ଅନ୍ତିମ ଦିନରେ ପରୀକ୍ଷାରେ ସନ୍ତୋଷଜନକ ପ୍ରଦର୍ଶନ କରୁଥିବା ପ୍ରତିଯୋଗୀଙ୍କୁ ଅଂଶଗ୍ରହଣ ପ୍ରମାଣପତ୍ର ପ୍ରଦାନ କରାଯିବ ।